Sugar –  Negative Effects on Health

తియ్యటి పంచదారలోని కటిక చేదు

అనాదిగా వస్తున్న మన జీవితవిధానం కూడా షుగర్ ఎక్కువగా తినడానికి కారణం అవుతోంది . ఉదాహరణకి ఏదైనా శుభవార్త విన్నా , ఇంట్లో ఏదైనా శుభకార్యం జరిగినా స్వీట్స్ ఉండాల్సిందే . ఎవరినైనా చూడటానికి వెళ్ళేటప్పుడు మనం  వెంట స్వీట్స్ తీసుకుని వెళ్తాo . ఇంట్లో ఎవరిదైనా పుట్టినరోజైతే కేక్ కట్ చేయిస్తాం . పిల్లలు ఏడుస్తుంటే చాకెట్లు ఇచ్చి ఏడుపు మాన్పిస్తాము . ఇలా ప్రతిదాన్నీ మనం స్వీట్స్ తో ముడి పెట్టేస్తాం . ఇక పెళ్ళిళ్ళలాంటి శుభకార్యాలైతే చెప్పనే అక్కర్లేదు . కాబట్టి విడిగా స్వీట్స్ కొనుక్కొని తినడం చాలావరకు తగ్గించాలి . అలాగే బంధువులు , స్నేహితులు ఎవరొచ్చినా వారితోపాటు కాఫీ , టీలు త్రాగటం తగ్గించాలి . పళ్ళరసాలలో   పంచదార వేసుకోకుండా త్రాగటం అలవాటు చేసుకోవాలి.

  షుగర్ తెచ్చే అనర్దాలివి :

స్థూలకాయం వచ్చే ప్రమాదం ఉంది . పళ్ళు పాడవ్వచ్చు . కొలెస్ట్రాల్ పెరిగి ఫలితంగా గుండెజబ్బులు రావచ్చు . స్త్రీలకు వక్షోజ క్యాన్సర్ మైగ్రేన్ , ఆర్తరైటిస్ కూడా రావచ్చు . శరీరానికి అవసరమైన బి కాంప్లెక్స్ ,క్రోమియం , కాపర్ , కాల్షియం , మెగ్నీషియం వంటివి అందవు . రుతు సంబంధ సమస్యలూ ఏర్పడవచ్చు . తరచూ మూడ్ మారిపోతుంటుంది . టెన్షన్ , డిప్రెషన్ ఎక్కువ అవుతుంది . కడుపులో ఎసిడిటీ ఏర్పడుతుంది .

నాచురల్ షుగర్ అవసరమే :

పళ్ళు , పళ్ళ రసాల నుంచి లభించే షుగర్ వల్ల హాని జరగదు . ఇంకా మనకి కావలసిన విటమిన్లు కూడా శరీరానికి అందుతాయి . క్యారెట్లు , బీట్ రూట్లు , చిలగడదుంప లాంటి వాటినుంచి నాచురల్ షుగర్ లభిస్తుంది . కావాలంటే తేనె , చెరుకురసం కూడా తీసుకోవచ్చు . అయితే తగుమాత్రంగానే  తీపిపదార్దాలు తినాలనిపిస్తే ఖర్జురాలు , యాపిల్స్ , మామిడిపళ్ళు తినవచ్చు . అడపాదడపా స్వీట్స్ తిన్నా ఫర్వాలేదు గాని రోజూ తినకండి . ఎందుకంటే తినగతినగ వేము తీపిగా మారితే షుగర్ చేదు అవుతుంది .

ఫ్యాట్ , షుగర్ శరీరానికి అవసరమే . కాని సమపాళ్లలో ఇవి ఉండాలి . అలాగే  చాక్ లెట్లని అస్సలు తినొద్దనడం లేదు కాని సమతుల్యతను పాటించాలి . పిల్లలకు పసితనం నుంచీ చాక్ లెట్లను పెట్టడం వల్ల ప్రాణాలకే ప్రమాదం అని పెద్దవాళ్ళు గుర్తించాలి . చాక్లెట్లు పట్ల ఆసక్తి , ఇష్టం అమ్మాయిల్లో ఎక్కువగా కనిపిస్తుంటుంది . ముఖ్యంగా ఫ్రీ  మెనుస్ట్రుయల్ సిండ్రోమ్ (పి ఎం ఎస్ )టైమ్ లో చాక్లెట్ బార్లు బాగా తినాలనే యావ వీరిలో ఉంటుంది . చాక్లెట్లు బాగా తినాలనిపించడానికి కారణం శరీరంలో క్రోమియం , మెగ్నిషియం లోటు . చాక్లెట్లలో మెగ్నీషియం శాతం ఎక్కువగా ఉంటుంది .
ఆడవాళ్ళకి ఋతుస్రావానికి ముందు ప్రొజెస్టెరోన్ హార్మోన్లు ఎక్కువ స్థాయిలో విడుదలవుతాయి. ప్రొజెస్టెరోన్ ఫ్యాట్ స్టోరేజ్ ని పెంచుతుంది . అందువల్ల అమ్మాయిలకి ఫ్యాటీ ఫుడ్స్ బాగా తినాలనిపిస్తుంది . చాక్లెట్లను ఎక్కువగా తింటే మైగ్రేన్ వస్తుంది . తలనొప్పి బాధిస్తుంది . లావు అవుతారు . బ్లడ్ షుగర్ తీవ్రతరం అవుతుంది . పళ్లనొప్పులు , హార్మోన్ల సమస్యలు తలెత్తుతాయి .   గుండె జబ్బులొస్తాయి . చాకోహాలిక్స్ లో మాదకద్రవ్యాల , మత్తుపానీయాల బానిసల్లో కనిపించే ప్రవర్తనా తీరు , బలహీనతలు , శారీరకరుగ్మతలు ఉంటాయి . చికిత్సలో కూడా పెద్ద తేడా ఉండదు . ఒక అధ్యయనం ప్రకారం 130 పౌండ్ల బరువున్న వ్యక్తిలో 2.5 పౌండ్ల చాక్లెట్ ని ఒక సిట్టింగ్ లో శరీరంలోకి ఎక్కిస్తే మారుజువానా ఇచ్చే మత్తు ఇస్తుందని తేలింది .
కృత్రిమ తీపి :

మధుమేహం , స్థూలకాయం లాంటి రుగ్మతలతో బాధపడేవారు తీపి పదార్దాలకు ఎంత దూరంగా ఉంటే అంత మంచిది . అయితే చాలామంది తియ్యని పదార్దాలకు అలవాటు పడినవారు వాటిని తినకుండా ఉండలేరు . ఇటువంటి వారికోసం పరిశోధకులు కృత్రిమ తీపినిచ్చే కొన్ని స్వీట్ నర్స్ ను సృష్టించారు . ఈ స్వీట్ నర్స్ ను తినే పదార్దాలలో కలుపుకొని తింటే తియ్యగా ఉంటాయి . కానీ అవి ఎటువంటి హానీ చెయ్యవని ఇప్పటివరకు అందరు భావిస్తున్నారు . అయితే , స్థూలకాయులు కృత్రిమ తీపినిచ్చే స్వీట్ నర్స్ ను తీసుకున్నా వారి బరువును నియంత్రించటం కష్టమైపోయిందని పరిశోధనలు తెలుపుతున్నాయి . కృత్రిమతీపిని తీసుకున్నప్పుడు మెదడు అది నిజమైన తీపిగానే భావించి మెటాబాలిజానికి గురవుతుంది . ఫలితంగా రాబోయే కేలరీలను గ్రహించటానికి మెదడు కొన్ని కణాలను విస్పోటనం చెందించి శక్తిని విడుదల చేయిస్తుంది .

అలాగే అనేక జీర్ణరసాలు కూడా ఇదే సమయంలో స్రవిస్తాయి . ఫలితంగా కడుపులో మంట (ఎసిడిటి ) తో పాటు స్థూలకాయం , యాంక్జయిటీ లాంటి అనారోగ్య లక్షణాలు కలుగుతాయని పరిశోధకులు అంటున్నారు . క్యాలరీలు లేని కృత్రిమ చక్కెర పదార్దాలు బరువు తగ్గించడంలో పెద్దగా తోడ్పడవని అమెరికా పరిశోధకుల అధ్యయనంలో వెల్లడైంది . ఎలుకలపై చేపట్టిన ఈ ప్రయోగంలో కృత్రిమ చక్కెర ‘శాఖరిన్ ‘ తిన్న ఎలుకల్లో బరువు తగ్గే అవకాశాలు అంతగా కనిపించలేదని తేల్చారు . చక్కెరకు బదులుకు కృత్రిమ తీపి పదార్దాన్ని ఉపయోగించటం వల్ల బరువు తగ్గటం అంత తేలికేమి కాదని పరిశోధకులు స్పష్టం చేశారు .
తీవ్రమైన ఒత్తిడికి ఉన్న వారికి స్వీట్ల మీద మోజు విపరీతంగా పెరిగిపోతుందని వివరిస్తున్నారు . తహతహలాడిపోవటం , తరచూ తీపి ఎక్కడుందోనని వెతుక్కోవటం … చాలా సందర్భాల్లో ‘ఒత్తిడి ‘ సూచకాల వంటివి . అలాగే ఒత్తిడిలో ఉన్నవాళ్ళు అమితంగా తినే అవకాశాలు కూడా ఎక్కువే . ఎందుకంటే ఒంట్లో శక్తి నిల్వలు తగ్గి … నిస్సత్తువ , అలసట అవరిస్తున్నప్పుడు … మన శరీరం తక్షణం శక్తినిచ్చే పదార్దాల కోసం తహతహలాడుతుంది . ఫలితమే మనం తీపికోసం వెంపర్లాడటం ! అవసరాన్ని మించి అతిగా తినటం . రెండోది తీపి తింటే ఒంట్లో ఒత్తిడి సంబంధమైన ‘గ్లూకోకార్టికాయిడ్ ‘ హార్మోను ప్రభావం వెంటనే తగ్గుతుంది .
అయితే ఇలా తీపి తినాలనిపిస్తోంది కదా . అని స్వీట్లు , మిఠాయి ఎక్కువగా తినటం , తిండి ఎక్కువగా తినటం మాత్రం కోరి కోరి అనారోగ్యాన్ని కొనితెచ్చుకోవటమే అవుతుంది . ఒత్తిడిని తగ్గించుకునేందుకు ఈ ‘తీపి తిండి ‘ మార్గం చాలా ప్రమాదకరమైంది కూడా . ఈ పరిస్థితుల్లో చెయ్యాల్సింది – తక్షణం ఒత్తిడి తగ్గించుకునేందుకు దీర్ఘశ్వాస వంటి టెక్నిక్స్ పాటించటం !దీర్ఘంగా శ్వాస తీసుకున్నప్పుడు ఒంట్లో శక్తి సమన్వయం, సర్దుబాటు జరుగుతుంది . ఒత్తిడి ప్రభావం , బడలిక భావన కూడా త్వరగా తొలగిపోతాయి .
తీపికి దూరంగా … :

పప్పుధాన్యాలు , చిక్కుళ్ళు , కూరగాయలు , తాజాపండ్లు బాగా తినాలి . సాధ్యమైనంత వరకూ శీతల పానీయాలు తాగొద్దు . చాలామంది పూరీలూ , ఇడ్లీలు , దోశలు , ఉప్మా …ఇలా ఏం తింటున్నా దానిలో పంచదార అద్దుకుని తింటుంటారు . ఈ అలవాటు మానుకోవడం మంచిది . చక్కెరతో తయారయ్యే కేకులు, పేస్త్రీలు , బేకరీ ఉత్పత్తుల్ని తగ్గించాలి . స్వీట్లను రోజూ కాకుండా ఎప్పుడన్నా మాత్రమే తినటం మంచిది . ఐస్ క్రీములకు బదులుగా తాజా పండ్లతో తయారుచేసిన డెసర్ట్స్ తీసుకోవటం మేలు .  ప్యాక్ లో నిల్వచేసిన పండ్లరసాలు కాకుండా ఇంట్లోనే ఎప్పటికప్పుడు తయారుచేసుకొని త్రాగటం మంచిది .

పండ్లను , పండ్లరసాల్ని చక్కర కలుపుకోకుండా తీసుకోవటం అలవాటు చేసుకోవాలి . ఎందుకంటే ప్రతి పండులోనూ సహజంగానే ఎంతోకొంత తియ్యదనం ఉంటుంది . నలుగురితో ఆనందాన్ని పంచుకోవటానికి … స్వీట్లనే ఆశ్రయించకుండా ప్రత్యామ్యాలు  ఆలోచించటం మంచిది . భోజనాల బల్ల మీద చక్కెర సిద్ధంగా ఉంచొద్దు . ప్రతిరోజూ వాడే చక్కెరను కొద్దికొద్దిగా తగ్గిస్తూ , తక్కువ చక్కెర వాడకాన్ని అలవాటు చేసుకోవాలి .
మరికొన్ని నష్టాలు :

చక్కెరలో పోషకాలేవి ఉండవు . కాని చక్కెర ద్వారా శక్తి క్యాలరీలు మాత్రం శరీరానికి విపరీతంగా అందుతాయి . మరోవైపు మన శరీరానికి విటమిన్లు , మినరల్స్ వంటివాటి అవసరం ఎక్కువగా ఉండడంతో ఈ చక్కెరను జీవక్రియలోకి మార్చటానికి ఒంట్లో ఒంట్లో ఉన్న కణజాలాన్ని కరిగించుకుంటుంది . దీనివల్ల శరీరం బలహీనమవుతుంది . శక్తి కోల్పోతుంది . చక్కెర రోగనిరోధక వ్యవస్థనూ అణచి పెడుతుంది . చక్కెర ఊబకాయం రావటంలోనూ కీలకపాత్ర పోషిస్తుంది . అతి చురుకుదనం , ఆందోళనం , ఏకాగ్రత లోపం వంటి సమస్యలకు దారితీస్తుంది. ట్రైగ్లిరైడ్లనూ , కొలెస్ట్రాల్ నిల్వల్నీ పెంచుతుంది . కణజాలం సాగే గుణాన్ని కోల్పోయేలా చేసి , వాటి పనితీరును దెబ్బతీస్తుంది . చక్కెర ఎంత ఎక్కువగా తింటే కణజాలం సాగేగుణం , పనితీరు అంతగా దెబ్బతింటాయి .

Book an appointment with us. We are just a Phone call away, Let us Talk.

Phone no : +91 9989759719

Amritha Ayurvedam Panchakarma Hospitals
D. No 4-62-7/A/1
plot No -162,MIG,
Main Road, 1st Floor,
Lawsons Bay Colony,
Near Baba Bazaar, Visakhapatnam,
Andhra Pradesh 530017

Follow Facebook, Twitter , Blog

Similar Posts

Leave a Reply

Your email address will not be published. Required fields are marked *